أنت مين
آيات من الكتاب المقدس
أنت مين
وسط الظلمة انا ماشي
بدور على النور
في طريق طويل
الكل قال عنه ممنوع
جنبي ناس شايفة حالي
و ماشية معايا ناس فهماني
مش بتقول اني مجنون
لقيت حواليا الشر بيزيد
عن كل يوم
وليلة لقيت الغش
بقى طبيعي
والكذب هو الحيلة
لقيت العنف اسهل
حل لمشاكل كتيرة
وانا ماشي في طريقي
هموت من الحيرة
طب انت إله عظيم
ليه ساكت على الشر
وانت برضو رحيم
فين عطفك على البشر
عايز اسال الاقي اجابة
ميقولوليش بعدين
ده انا ف حيرة من سنين
بيقولوا الشر مش من عندك
لكن بتسمح بيه طب ازاي
انا اصدق ومحسش بخوف
بيقولوا لازم أأمن في حاجات
مش بتتحس وامشي في ظلمة
من غير ما عيني تشوف
ازاي اتطمن على بكرا
وانا محاصرني الماضي
و اصدق انك عادل و
انت بالظلم راضي
واللي عايش في الحرمان
تقوله لازم نستكفي ازاي
بتقول بتحبني ومعايا ف صفي
لو كل أمر بايدك
وليك كل السلطان
طب ليه في ناس بتضيع
وتروح في خبر كان
مع صوت الصراخ
بحس انك بعيد
انا عايز اعرف انت مين
قولي انت مين
محتاج ردود لحيرتي
لنور يبدد شكّي
محتاج لإيد تتمد لي
قولي انت مين؟